MOESTITIA Publica

MOESTITIA Publica

variis olim indiciis testata reddita est. Vestibus scissis: Sic Iosias, intelectô quid a violatoribus legis quantumque exigat Deus, ingenti adactus dolore, vestem regiam discidit, apud Iosephum. Diademate depositô: quô habitu et David peccatorum poenas a Deo deprecatus est. Vide Salvianum l. 4. Vel coronis laetitiae indicibus: Sic Cato, ex quo die cedentem urbe Pompeium sequutus est, nec caput rasitâsse, nec barbam, nec coronam capiti imposuisse, legitur apud Plut. in Catone Iun. Imo et diademate scissô ac laceratô. Stat. de Adrasto Theb. l. 9. v. 162.

--------- Heu qualem versare in sanguine vidi

Exutum canos lacerô diademate crineis.

Sic Tigranes, Armenii Regis filius, intellectô periculô Patris, ob non missas ad Cyaxarem copias, nec tributum, tiaram concîdit apud Xenoph. de Institut. Cyri l. 3. Potissimum, indictô ieiuniô, cum omnis aetas, omni positô ornatu, sordibus et squalore obsiti, universi id unice agebant, ut sibi Deum propitiarent, quemadmodum de Nievitis atque ipso illorum Rege, legimus, in Prophetia Ionae. Quam in rem Prudentius Cathemer. 7. v. 156.

Rex ipse Coos aestuantem murices

Laenam revulsa dissipabat fibulâ.

Gemmasque virentes et lapillos subtileis;

Insigne frontis exuebat vinculum,

Turpi capillos impeditos pulvere, etc.

Vide Car. Paschalium Coronar. l. 10. c. 11. et hîc passim inprimis, ubi de Lugendi ritibus.